ក្រចេះ​៖ ថ្មីៗ​នេះ​សកម្មភាព​របស់​មេ​ឈ្មួញ​ឧក្រិដ្ឋកម្ម​ព្រៃឈើ និង​បំផ្លាញ​ផ្លូវថ្នល់​ដឹកជញ្ជូន​ឈើ​តាម​រថយន្ត​យី​ឌុប យកទៅលក់​នៅ​ប្រទេស​យួន​ក្នុង​មួយ​យប់ៗ​មិន​ក្រោម​ពី ៤០​គ្រឿង ទៅ ៦០​គ្រឿង ដែល​ប្រជាពលរដ្ឋ​រស់នៅក្នុង​ខេត្ត​ត្បូងឃ្មុំ ស្គាល់ឈ្មោះ​មេ​បំផ្លាញ​ព្រៃឈើ​សត្វព្រៃ និង​ផ្លូវថ្នល់​នោះ គឺ​លោក ប៊ុន ថៃ ដែលមាន​មេការ​ឈ្មោះ ធី ជា​ដៃស្តាំ​ផ្ទាល់ អាច​បញ្ជា​ឱ្យ​កម្មករ​អារច្រៀក​ឈើ​ឱ្យទៅជា​ឈើ​គ្រឿង​ដែល​ត្រូវប៉ាន់​តាម​មេ​ឈ្មួញ ជនជាតិ​យួន​កម្មង់​ដោយ​បញ្ជា​ឱ្យ​កម្មករ​ធ្វើការ​អារច្រៀក​ឈើ​ទាំងនោះ ចេញពី​តំបន់​ព្រៃ​អតីត​ដីព្រៃ​សម្បទាន​ក្រុមហ៊ុន​អភិវឌ្ឍន៍​ខ្មែរ​អង្គរ តំបន់ភ្នំ​ព្រេច​ក្នុងស្រុក​ស្នួល ខេត្តក្រចេះ ជាប់​ព្រំប្រទល់​ខេត្ត​មណ្ឌល​គី​រី រួច​គេ​ដឹកជញ្ជូន​ឈើ​តាម​រថយន្ត​យី​ឌុប​មាន​ទ្រុង​សម្គាល់​ពណ៌​ត្រេ​អី ឆ្លងកាត់​ស្រុក ស្នួល ខេត្តក្រចេះ ឆ្ពោះទៅ​ខេត្ត​ត្បូងឃ្មុំ ព្រំប្រទល់​ប្រទេស​កម្ពុជា និង​ប្រទេស​យួន ។​

​ប្រភព​ដដែល​រាយការណ៍​ខាងលើ​បានឱ្យដឹងថា រាល់​សកម្មភាព​ដឹកជញ្ជូន​ឈើ និង​បំផ្លាញ​ផ្លូវថ្នល់​ទាំងនោះ ដោយ​ដាក់​ជំនៀរ​ឈើ​ខាងលើ ។ រីឯ​ឈើ​ឆ្អិន​បង្អ​ប់​ខាងក្រោម​មាន​ឈើ​ធ្នង់ ឈើក្រហម ឈើ​សុ​ក្រំ ផ្ចិ​ក និង​ឈើ​ប្រណីត​ប្រភេទ​ឈើ​ធ្នង់ ដឹក​បាន​យ៉ាង​រលូន​មិនមាន​ការរំខាន់​ពី​សំណាក់​អាជ្ញាធរខេត្ត និង​សមត្ថកិច្ច​ជំនាញ​រដ្ឋបាល​ព្រៃឈើ​ក៏ដូចជា សមត្ថកិច្ច​ពាក់ព័ន្ធ​ឡើយ ដែល​សកម្មភាព​ទាំងនោះ ត្រូវបាន​ប្រជាពលរដ្ឋ​រាយការណ៍​ថា កើតឡើង​យ៉ាង​គគ្រឹកគគ្រេង និង​ស្ទើរតែ​រាល់ថ្ងៃ​រាល់ យប់​ខូង​ផ្លូវថ្នល់ ក្លាយជា​អូរ​ក៏​គ្មាន​អាជ្ញាធរខេត្ត និង​មន្ត្រី​ជំនាញ​សមត្ថកិច្ច​ណា​អើពើ​ដែរ ។ ដោយហេតុថា ក្រុម​មេ​ឈ្មួញ​ឧក្រិដ្ឋកម្ម​ព្រៃឈើ​សត្វព្រៃ ផ្លូវថ្នល់ លោក ប៊ុន ថៃ ខាងលើ​បាន​បង់​ខែ បង់លុយ​ឱ្យ​អភិបាលខេត្ត មន្ត្រ​ជំនាញ​រដ្ឋបាល​ព្រៃឈើ និង សមត្ថកិច្ច​ពាក់ព័ន្ធ ដោយ​អ្នកខ្លះ​គិត​រាប់​ក្បាល​ឡាន​អ្នក​ខ្លះទៀត​បង់​ប្រចាំខែ ។​

​គួររំលឹកថា ដីព្រៃ​សម្បទាន​នៅ​តំបន់​ខាងលើ ត្រូវបាន​រដ្ឋាភិបាល​ដ​ក​ពី​ក្រុមហ៊ុន​សម្បទាន​នោះ កាប់​យកតែ​ឈើ​មិន​ធ្វើ ការអភិវឌ្ឍន៍​អ្វី​សោះ ខុស​លក្ខខណ្ឌ​ដាំ​ដំណាំ​កៅស៊ូ ។ ពាក់ព័ន្ធ​សេចក្តីរាយការណ៍​ខាងលើ ភ្នាក់ងារ​អ្នកយកព័ត៌មាន​យើង​មិនទាន់​អាច​ទំនាក់ទំនង​សុំ​ការបំភ្លឺ​ណាមួយ​ពី​សំណាក់​អាជ្ញាធរខេត្ត មន្ត្រីរដ្ឋបាល​ព្រៃឈើ សមត្ថកិច្ច​ពាក់ព័ន្ធ និង​លោក ប៊ុន ថៃ បាន​នៅឡើយ​ទេ​៕
​